1Th 1 | WSK | STEP | Ani Paul, se Silas, se Timothy, ana den imi bataguru nina Ba Kaem se Kari Biya Jesus Kristus ko kariimet Thessalonica bagasan mu ningarsan.

1 Thessalonians 1

Den gira

1 Ani Paul, se Silas, se Timothy, ana den imi bataguru nina Ba Kaem se Kari Biya Jesus Kristus ko kariimet Thessalonica bagasan mu ningarsan.

Paul Thessalonica Kris alo nunga amilmilakaso

2 Ana tom suen biya nina suen la nego ko Kaem amilmil tusan, ale anananga ngatangara te nina nego ko balsan. 3 Nina nengemang ningi nunguning aora biya, se ninimi ko kuesan, ale te ura yawara bita se munan ningo ningo betesan. Ale nina nanga Biya Jesus Kristus tairukko nengemang ningi nunguning sokel ago kimi bita se bagasan. Se ana nego ko nanga Ba Kaem manaru se ninga dugu duap uwutata balsan, ale ko nu amilmil tusan nup patowasan.

4 Nanga singsang, ana ikisan Kaem ninga kueso ale nina noko ma ninga balam se bagasan. 5 Mu awuk, ana den gilalong yawara nina nengete karogo taiman mu den yam iwita mena, mu Korang Bur te sokel ago aratam, ale nengemang ninguru atumam. Se munan aguwaya te ninga saonga ko ana ninga ningi baga se bitakasan, mu nina aringiman ko ikiman. 6 Ale nina anananga munan se Kari Biya ko munan karo tuikasan. Se ikup yaman ninguru ningarukasan, bare Korang Bur amilmil ningarukaso, se Kaem ko den mu amilmil ago la tokasan. ^{▼▼1 Thes 1:5-6 Nuna Korang Bur ko sokel te ura bitakasan: 1 Cor 2:4-5. Kris alo ikup gikasan: Acts 17:5-10.}

7 Umutang te nina Macedonia se Achaia Kris alo mu munan yawara nunga kasurukasan. 8 Kari Biya ko dugu duap nina balukasan mu ko nirung goyak iwita namakaso. Ale Macedonia se Achaia nunga sor te la me namakaso. Mena. Nina Kaem ko nengemang ningi nunguning mu sor suen biya ninga ikiman. Buta se ana den bo balnakko mena. 9 Mu awuk, ana nengete namaman se mel aratukaso mu nuna nongota ko dugu duap balsan. Ale nina aguwaya kaem kawel nibiring nungarman, ale giris palagaman, Kaem nunguning marak bagoso mu kote namaman ale ko ura kariimet ko arataman, ale ko Namar Jesus duruk wonong te tai kapurukko mu ko kimi bitawasan, mu nuna ko dugu duap balu gilingisan. Kaem ko Namar Jesus kueram se Kaem aking maraguwuram se barasam mu borta nu Kaem ko gomang magara tairukko mu ningi nanga bataguru taukko.

10